Dio, stari!

(Izvor:Marin Grgeta)Stvarno je u klincu taj svit. Definitivno vidin da ni pravde, da ni juštece i da smo stvarno niš na ten svitu. Danas te je, sutra te ni, ma ča govorin sutra, za minut, za sekundu te ni... Tako je partija i naš Burić. Zašto on, ča je on skrivija, ke dug je on ima za platiti sa svojih nanke dvajset i sedan lit? Zna je i on koji put voziti malo brže, ma uvi bot ne. Jušto ne. Ni moga niš, ni moga škapulati. Jedan drugi ragač je poša preticati kurijeru, na jenoj od tih naših prokletih cesti i trefila je tragedija. Uvemu ki je, izgleda, kriv, niš, a Burić je usta tamo. U sekundi. Živiš, se mučiš, patiš, se raduješ, te je strah, si nervož, si kuntenat, se nadaš, pensaš na čer, na danas, na sutra, na prikosutra, na starost, a i na male stvari, one od svaki dan... I onda u sekundu tir, prah, dim i ciao, fertig. I sam san lani škapula za las i dosta san pensa o temu. Ne moreš niš, ne moreš si pomoći. Iskoristiš to za doj van jači, trđi, zriliji, bolji, pametniji. Ako imaš sriće. Kako ča san ima ja, a brižan Burić ne. Ni mu bila laka. Nikad. Dela je, mučija se, tendija bonu mater i sebe. Oca je zgubija još kao dite, kad mu je najveć rabija. Zaspravlje mu ni bila laka. Iz malega sela svako jutro u Vrsar u školu, vozija bi ga pokojni stari s traktoron. Pomaga je i doma, u kampanji, a puno, preveć tega mu je palo na život kad je stari umra. Prebrzo je mora uresti, imati ozbiljne pensire dokle su drugi od njegovih lit pensali samo na bis i zajebanciju. Pomogli su mu i drugi, i parenta i brojni prijatelji – ni bija sam, ma sve si je mora sam teško zaraditi. I svejeno je vajk ima onaj smih na ustima, vajk pronat na zajebanciju, na lipu besidu... Ta štorija ni iz serije «o mrtvima sve najbolje». Burić je zaspravlje bija ljudina. Beskrajno more ljudi ki ga je došlo zadnji put pozdraviti u ponediljak u Gradinu najbolji su dokaz. Jako me je dirnula ta smrt i ta sudbina. Ne moren reći da smo bili veliki prijatelji, vajk skupa i to. Znali smo se. Svako toliko, kad bimo se sreli, pozdravili bimo se, katrkad popili pijaču, ćakulali o svakodnevnin stvarima ili jednostavno pitali «kako je, smo ča?». Bilo je dosta, s takovin ljudima je malo dosta. Bez malicije, bez slabine, bez invidije, bez nametljivosti. Prerano je partija. Jušto ni merita tako rano partiti. Ne znan ko je ča tamo gori, nisan religiozan. Ali ko je, a uvi put se nadan da je, nadan se da Burić ima di poj čeniti đir sa svojin kroseron, di se sisti, užgati svoj tabak i popiti dva deci bire, kon la kalma. Počivaj u miru stari, i ne brigaj se: nećemo te zabiti!